1Cor 4 | ASO | STEP | Lingine lelikumu' nene Kilisito' gonolo' ve mini O'moso'mi gamazi suno' minido' gizebo igi li-ngimi ngimi' iga' ave ma nene nizave lisa gili minilo.

1 Corinthians 4

Paulo' Aposololite Gono Dani' Ne'mi Monovomu' Line'

1 Lingine lelikumu' nene Kilisito' gonolo' ve mini O'moso'mi gamazi suno' minido' gizebo igi li-ngimi ngimi' iga' ave ma nene nizave lisa gili minilo. 2 Ido' gonolo' ve ngele'mize milavemu' nene ngele'mize milavete ti' li gilaa' nave: Gote izami lunidokovo' e'meti gono di minilizani' o neive. Ne'mine li gilaa' nani' nenako nemu' nene Guvelesi ve'mo eze gonolo' gizebo ve lele'mize molani' nenako lelikumu' nene ne'mine lo gele noloseive. 3 Ne'mine lo gelo neni' gono've daa' nouvoni' monovo nene lamine' nehe goloso nehe lo ninge'mo vo mineline' o neive. Ne'mine iline' nenako lengitatipe evenetatipe goni'ne ma soto' ogavo monovo'nemu' ize' mili goni' ma i-nidilizani' nene inite' naba neive lo gelamolosuve. 4 Naza nene O'moso'mi gono daa' nouvongu' nene do goloso oga' uvoni' monovo'ne nene ma nomive lo gele nouvoni'za ne'mine lo ga'ne giluvonguti' nene nenikumu' O'moso'mo giluvongu' gele noline' nene laza ngelo soto' ivo ningamolosunako nemu' nene gamazi'ne nomine' nouve lo lamolosuve. Ido' nenikisi nehe evene' gohi masi nehe neze monovo'nemu' ize' molo loso' nene vo damoloseive. Guvelesi ve ei' hamo' ne'mo nene neze monovo'nemu' ize' molo lilive ne neive. 5 Nemu' nene Guvelesi ve aline' gamene olihe amido' lingine nene lite' li evene' monovotemu' ize' mili gamazi laa' nani' nene huli Guvelesi ve alingumu' nene gizebo ilo. Aza nene ogo inite' li'nimusou' minani' nene do soto' molo evene' vai' luteu' nene nadive lo gelaa' ube ne'mine lemeni damenite nene do soto' ogavo ningelesune. Ne'mine ogo luteu' nene nadive lo gelo ido' nani lemeni dameni molo monaa' ube a'mido' a'mido' O'moso'mo do naba o-ledo lopo'ni lilido' noline' nene lopo'ni loloseive.

6 Neze zuhokizo, gamazi muki' mene mono' gono daa' usive nenitasi Apolodasi lo molo noluvoni' nene a'minguti' mono' godolou' gizi nizani' neine' gamazi avuto' amaa' monovomu' nene vise' igi gili dalizangisi evene' linge ma di naba i-ngidi linge ma divi ledivi' i-ngidi lingine mono' gono daa' aveuti' dizo minive nene e'metaa' noune li okodine di dizisa gavele ve gehesami minilizave losa monoku' hize ele' o-lengedelesa noluve. 7 Evene' muki' lengikumu' gilavo dize nonive ne none li gilaa' nahe. O'ove. Lingine nene dizi nizave ne minamave. Lengita O'moso'mo lengemamine' inite' nene nanite' neve. Ma nomive. O'moso'mo inite' mata' nene lengeme osu' lo neine' nenako lingine gilavo O'moso'mo inite' mata' lengemamine' gelavo leli' do soto' okune li okodine nanimu' di hozi laa' nave. 8 Lingine gilani' lutingu' lutine'mi noso' nite' nene vai' lave lisa gili nizahe. E'e, mo vai' lamive. Ido' lingine gilani' monoli'mi heneni nene lengita mo vai' lavo none lisa gili nizahe. E'e, monoli'mi heneni nene lengita vai' lavo ma minamave. Ido' laza nene lengikisi minamunivo monoku' guvetinesi ve mo lili' ikeni' neive. E'e, guvetinesi ve ma lili' amaha ma lili' adiniko lengikisi lelikisi nene maka' guvetesi ve naba minunidine. Ne mo ede vidine' ha lili' ilizanakoo. 9 Loma ve mono' gilamavete sou' di soto' ado' evene' mukiliti ve'nido' inite' ato ato' muki' di soto' igisa alinge' nene evene' niningavo ngibili hililizave li evene' goloso ma di soto' iga' ani' nee ma'mino naza leli' aposolomu' nene giluvoni' O'moso'mo lelikumu' a'mine ngibili hililizave ne'mine minikevo angelolesi evenekisi mukito' nene ningi minilisave lo leli' do alinge' molo-ledo do soto' o-lidine' gelavo haza inite' lolo' okune losa gele nouve. 10 Laza nene Kilisito'ni e'metuningumu' ve losa negi ve ne'mino none'za lengi' nene Kilisitoda imi hili lengikumu' nene laza monoku' otohato ve none li gilaa' nave. Ido' laza nene amuzo molamune'za lingine lengikumu' nene amuzo malehe none laa' nave. Lingine nene evenelite lengikumu' gilavo dizaa' neive li laa' naha leli' nene evenelite divi ledivika li-lidaa' nave. 11 Ido' gamene gala'mudati' mine do dizo idise gamenelo' ivo aposolo laza Kilisito' gonolo' nomonuningu' nene hepe' nosomu' luvode ga'naba gizivo mino ido' naa' initekumu' ga'na helo mino ido' okodelo' inite' nomivo vise' ogo minaa' noune. Ido' a'ine gavoso libili goboni mili-lidavo molo gelo mineso' numuno ebekisi nomivo mono none. 12 Ido' laza nene okode losuvo'mi inite' nene dalone lo gono la'lisete amuzo molo leli' adedunu' daa' noune. Ido' evenelite goboni mili-lidani' gameneu' nene a'minemu' goloso gelamo hongu lo minaa' noune. 13 Ido' gamazi goloso palasa li-lidikevo ma laza nene do hongu gamazi lo-ngemaa' noune. Ee, gamene gala'mudati' mine do dizo idisesi nene evene' me misubou' alevete lelikumu' gilani' leze nene sihononi gehepeve nizave li vasa izi-ngidaa' ave ma'minosa nene none.

14 Ido' naza luhuvo inite' mene longovozo hililizave losa gize lengemamuve. Asi lingine nene neni' izipaha'ne nizani' gelavo lu'ne lengeme nouvoni' nenako nemu' gatine dosa luhuvo inite' mene nogize lingimuve. 15 Lingine Kilisito' monoku' lengi' gizebo vetine nene vai' li nilisaha neni' nene gana' Kilisito'nimu' gamazi lamine' nene lo-lengemekuvo neloti' gili ele'vole' ikevosa neni' hamo' nene metibine lolo' okuve. Nemu' nene metinge vai' ma nizamave. 16 Nemu' nene neni' monovolo' e'meti alizave losa gatine do noluze. Gililo. 17 Lingine ne'mine ilizave lo Timoteo'ni imiselekuvo lengita novive. Aza nene lu'ne eme nouve Guvelesi ve'mi mono' akalo' ele'mize molokuvo gipe'ne lolo' ogo mino lulo lisihe' o neivo gono lamine' daa' ive ve. Aza nene lengita ogo hetelo Kilisito'ni e'meto ogo molo minaa' nouvoni' monovo nene dalizave lo Izesu' Kilisito' evenele zuho mulise mini'mi monada muki' apize ngemaa' nouvoni' ma nene lo gatine oloseive. 18 Ido' lengikuti' linge malite neni' nene nonida amoloseinako ngelo ogo lelemelihe li hokolize' igi gopo minaa' nani'za 19 Guvelesi ve'mo nenikumu' lengita alive lo gele noline' nene ei' lulolo' e'meto naza mine ha'na amo lite' lo alosuve. Ido' evene' ma ingine O'moso'mi gizebou' vo hulunive ne none likevosa haza gamazi lilizadotikovo' nene a'mine'mi gihile nene ningamo O'moso'mi amuzo nesi engita soto' neivosasi nene ningaa' nounako naza nene ogo a'mine hokolize' iga' ani' aleve nene oko'ine di hozi li gamazi gopo laa' niilisanako a'minemu' nene gelamo gele hulo O'moso'mi amuzo nene engita neihe nomihe nemukovo' nene ningelove. 21 Ido' lingine nadive li nigilave. Nenikumu' nene lebelaa' gavososi do ano li gili nizahe. E'e, ti' lii ma gilamilisanako nemu' nene lu'ne laminekisi hongu lo mino nasahili' o-lengedelesa alosuvonako nemu' monovotine nene di lamine' igi minilo.